ඖෂධ නැහැ – රෝගීන් දැඩි පීඩාවක
රිජ්වේ ආර්යා ළමා රෝහලේ 10% ක ඖෂධ හිඟයක් පවතින බව රෝහල් අධ්‍යක්ෂ වෛද්‍ය ජී. විජේසුරිය මහතා පවසයි. ඔහු සඳහන් කළේ, ඒ අතර අත්‍යවශ්‍ය ඖෂධ පවතින බවය.
රෝහල් අධ්‍යක්ෂ වෛද්‍ය ජී. විජේසුරිය මහතා වැඩිදුරටත් පැවසූවේ, ඖෂධ හිඟතාවය තිබුණ ද රිජ්වේ ආර්යා ළමා රෝහලේ කිසිම ආකාරයකින් ප්‍රතිකාර කටයුතු නතර කර නොමැති බවයි.
මේ අතර ශල්‍යකර්මවලදී බහුලව භාවිත කරන නිර්වින්දන ඖෂධ ජාතික රෝහල ඇතුළු රෝහල් පද්ධතියේ උග්‍ර ලෙස හිඟවීම හේතුවෙන් රෝගී ජීවිත දැඩි අවදානමකට ලක්වෙමින් පවතින බව සමස්ත ලංකා වෛද්‍ය නිලධාරීන්ගේ සංගමය සඳහන් කරයි.
මීට අමතරව ශල්‍ය උපකරණ, වේදනා නාශක, පිළිකා රෝගීන් සඳහා ලබාදෙන ඖෂධ, බෝ නොවන රෝග සඳහා ලබාදෙන ඖෂධ සහ කුඩා දරුවන්ට ලබාදෙන ඖෂධවල ද උග්‍ර හිඟයක් හෝ එම ඖෂධ අවසන් වීමක් මෙරට සමස්ත රෝහල් පද්ධතියේම දක්නට ලැබෙන බව එම සංගමය කියයි.
එමෙන්ම ඔසුසැල්වල ඖෂධ මිල ගණන් ද පැවැති මිලට සාපේක්ෂව හතර ගුණයකින් පමණ ඉහළ ගොස් පැවැතීම නිසා පිටතින් ඖෂධ ලබාගැනීමට රෝහලින් ලබාදෙන ඖෂධ ලැයිස්තුව මිලදී ගැනීම වෙනුවෙන් රෝගී ජනතාවට විශාල අපහසුතාවන්ට මුහුණ දීමට සිදුව ඇතැයි ද සමස්ත ලංකා වෛද්‍ය නිලධාරීන්ගේ සංගමයේ ප්‍රධාන ලේකම් වෛද්‍ය ජයන්ත බණ්ඩාර මහතා සඳහන් කර සිටියා.
