ලාංකීය චිත්‍රපට තුනක් එකම මාසයේදී එකවර තිරයට එයි
2022 වසර මුල සිට නිකුත් වුනු විවිධ ලාංකීය සිනමාපටවලින් අනතුරුව, මෙම සැප්තැම්බර් මාසය තුළදී මෙරට නිර්මාණකරුවන් තිදෙනෙකුගේ තවත් සිංහල චිත්‍රපට ත්‍රිත්වයක්ම සිනමාශාලා ප්‍රදර්ශනය ඇරඹීමට සූදානම් වනවා. එකිනෙකට වෙනස් තේමාවන් සහ කතා ශානරයන් පදනම් කරගෙන නිර්මාණය වී ඇති මෙම චිත්‍රපට ත්‍රිත්වයෙන් දෙකක්ම අදාළ අධ්‍යක්ෂකවරුන්ගේ පළමු – කුළුදුල් වෘතාන්ත සිනමාපටයයි.
මේ අයුරින් එකම මාසයක් තුළදී ලාංකීය චිත්‍රපට තුනක් එකවර ප්‍රදර්ශනය අරඹන්නේ ද දිගු කාලයකට පසුවයි.
සැප්තැම්බර් 02 – සිනේ මා
සැප්තැම්බර් 08 – පියාඹන්න ආයෙත්
සැප්තැම්බර් 15 – හිතුමතේ ජීවිතේ
සිනේ මා (The Film and Me)
සිනමාව හා බැදුණු පුද්ගලයින් හය දෙනෙකුගේ සිද්ධි දාමයක් මුල් කරගෙන දිවෙන ‘සිනේ මා’ චිත්‍රපටය අධ්‍යක්ෂණය කර තිබෙන්නේ කපිල සූරියආරච්චි විසිනුයි. වෘත්තියෙන් වෛද්‍යවරයෙකු වන ඔහුගේ දෙවන චිත්‍රපට අධ්‍යක්ෂණය වන්නේ මෙයයි.
පුද්ගලයින් හය දෙනෙකු එකිනෙකට වෙනස් මාර්ග ඔස්සේ සිනමා කර්මාන්තයට පිවිසෙන ආකාරයත්, සිනමාව තුළ එකිනෙකාගේ ගමනට අනෙක් පුද්ගලයින් කරන බලපෑමත් මෙම නිර්මාණය ඔස්සේ දැකගත හැකියි.
සිනමාපටයක් අධ්‍යක්ෂණය කරන්නට සිහින මවන සුමල් ධර්මරත්න…
සිනමාව පිළිබඳ ඉගෙන ගන්නට වෙර දරන තරුණ ජාලිය ජයසේකර…
නිළියක වීමට සිහින දකින තිළිණි සමරසිංහ…
සිනමාව ව්‍යාපාරයක් කරගත් කූට ව්‍යාපාරික විශ්වකීර්ති අමරසූරිය…
ආදී චරිත හයක් වටා ගෙතෙන මෙම ‘සිනේ මා’ චිත්‍රපටයේ ප්‍රධාන භූමිකා රඟ දක්වන්නේ ශ්‍යාම් ප්‍රනාන්දු සමඟින් විහඟ සූරියආරච්චියි.
ඊට අමතරව නයනතාරා වික්‍රමාරච්චි, බිමල් ජයකොඩි, ඉසුරු ලොකුහෙට්ටිආරච්චි, ඩග්ලස් රණසිංහ, දුලීකා මාරපන ආදී ජනප්‍රිය නලු නිළියන් ගණනාවක්ම මීට සම්බන්ධ වී තිබෙනවා. 2019 වසරේ යුක්‍රේනයේ Kiev International Film Festival සඳහා ලංකාව නියෝජනය කිරීමටත් ‘සිනේ මා’ සමත්වුනා.
මෑතකාලයේ නිකුත් වූ සෙසු චිත්‍රපටවලට වඩා වෙනස් කතා අන්තර්ගතයක් සහිත මෙම නිර්මාණය ඔබට ළඟම සිනමාහලෙන් දැන් නැරඹිය හැකියි.
පියාඹන්න ආයෙත් (Fly Once More)
Romance – Road Movie ශානරයේ සරල ආදර කතාවක් සහිත ‘පියාඹන්න ආයෙත්’ සිංහල සිනමාපටය මෙම සැප්තැම්බර් 08 වනදා සිට දිවයින පුරා තිරගත වීමට නියමිතව තිබෙනවා. ජනමාධ්‍යවේදී ෂර්ලි සමරසිංහ මෙහි අධ්‍යක්ෂකවරයා වන අතර මෙය ඔහු නිර්මාණය කළ පළමු වෘතාන්ත සිනමාපටයයි.
Road Movie ශානරයට අයත් වන චිත්‍රපටයක් නිසා දිවයින පුරා සංචාරය කරමින් මෙරට සුන්දර දර්ශන තල ගණනාවකදීම මෙහි රූපගත කිරීම් සිදු කරන්නට නිෂ්පාදක කණ්ඩායම පෙළඹී තිබෙන අතර නුවරඑළිය, යාපනය, බදුල්ල, කතරගම ආදී ප්‍රදේශ රාශියක් මේ සඳහා යොදා ගෙන තිබෙනවා.
ඉතා සීමිත නලු නිළියන් පිරිසක් යොදාගෙන නිර්මාණය කර තිබෙන මෙහි ප්‍රධාන චරිත ද්විත්වයට එක් වන්නේ කළණ ගුණසේකර සමඟින් චමත්කා ලක්මිණි යි. කළණ ගුණසේකර රඟන සිනමාපටයක් එක පෙළට නිකුත් වන දෙවන අවස්ථාව මෙය වන අතර පසුගිය ජුලි මාසයේදී ද ඔහු රඟපෑ චිත්‍රපටයක් ප්‍රදර්ශනය ඇරඹුවා. ඒ කසුන් පතිරණ අධ්‍යක්ෂණය කළ “Night Rider” චිත්‍රපටයයි. දින 50 පසු කරමින් එය ද මේ වනවිට සාර්ථකව තිරගත වනවා.
‘පියාඹන්න ආයෙත්’ හි නිෂ්පාදනය සහ තිර පිටපත උදාර පල්ලියගුරුගෙනි. මෙහි නිෂ්පාදන පිරිවැය දරන්නේ ඔහුගේ DCinema ආයතනයයි. චිත්‍රපටයේ කැමරාකරණය ගයාන් ගීතප්‍රිය විසිනුත්, සංස්කරණය නිරෝධ වීරංග විසිනුත් සිදු කොට තිබෙනවා.
මෙහි ඇතුළත් වන රිද්ම වීරවර්ධන විසින් ගායනා කරන “මාරුතේ” නැමැති ගීතය පසුගිය දිනවල අතිශය ජනප්‍රියත්වයට පත් වුනා.
එළඹෙන සැප්තැම්බර් 08 වනදා සිට ඔබට මෙය නැරඹිය හැකියි.
හිතුමතේ ජීවිතේ (The Wandering Life)
කළුතර ප්‍රදේශයේ ගම්මානයක ජීවත් වූ දුප්පත් තරුණියක දූෂණය කර – මරා දැමූ ඝාතකයින් පිරිසක් සහ ඔවුන් වටා හඹා යන එම තරුණියගේ සොහොයුරා අතර සිදු වන සිද්ධි දාමයක් ‘හිතුමතේ ජීවිතේ’ සිනමාපටයට පාදක ව තිබෙනවා.
උදේනි සමන් කුමාරගේ ග්‍රන්ථයක් ආශ්‍රය කරගෙන රචනා කොට තිබෙන මෙම සිනමාපටයේ අධ්‍යක්ෂකවරයා වන්නේ ක්‍රිෂාන්ත මනම්පේරි යි. වෘත්තියෙන් ගුවන් හමුදා නිලධාරියෙකු වන ඔහු මින් පෙර ටෙලි නාට්‍ය කිහිපයක් ද අධ්‍යක්ෂණය කර තිබෙනවා. නමුත් ක්‍රිෂාන්ත මනම්පේරිගේ පළමු සිනමා ආගමනය වන්නේ මෙයයි.
මෙම චිත්‍රපටයේ ප්‍රධාන භූමිකාව වන ‘හිතුමතේ ජීවිතේ’ හෙවත් සුමතිපාල‍ගේ චරිතය නිරූපණය කරන්නේ දිනෙත් ද සිල්වා විසිනුයි. මහේන්ද්‍ර පෙරේරා, ජයනි සේනානායක, කුමාර තිරිමාදුර, ප්‍රියංකර රත්නායක, රොජර් සෙනවිරත්න සහ දමිතා අබේරත්න වැනි මෙරට ජනප්‍රිය නලු නිළියන් ගණනාවක්ම මෙහි සෙසු චරිතවලට රංගනයෙන් දායක වනවා.
හිතුමතේ ජීවිතේ තිර පිටපත් රචනය ඉන්දික අතුල ප්‍රියන්ත විසිනි. කැමරා අධ්‍යක්ෂණය Secret of The Rose, ගොවිතාත්තා, භවතරණ ආදී නිර්මාණවල කැමරාව හැසිරවූ නිශාන්ත ප්‍රදීප් විසිනුයි. රුක්මල් නිරෝෂ් සංස්කරණය සිදු කළ මෙය ගයාත්‍රී කේමදාස සහ සාගර විජේසිංහගේ සංගීත අධ්‍යක්ෂණයෙන් හැඩ වී තිබෙනවා. හිතුමතේ ජීවිතේ විහාරා සමරසිංහගේ නිෂ්පාදනයකි.
මෙම සැප්තැම්බර් 15 වනදා සිට EAP මණ්ඩලය ඇතුළු දිවයින පුරා සිනමාශාලා 50කට ආසන්න ප්‍රමාණයකට ‘හිතුමතේ ජීවිතේ’ සිනමාපටය මුදා හැරෙනවා.
