ගාසා තිරයේ හදවත බඳු නගරය ඊශ්‍රායලය අතට
ඊශ්‍රායල ආරක්ෂක අංශ නිවේදනය කළේ ගාසා තිරයේ හදවත බඳු ගාසා නගරයේ පාලනය තම භට පිරිස් විසින් මේ වන විට නතුකරගෙන සිටින බවයි.
මාසයකට වැඩි කාලයක් පුරා ක්‍රියාත්මක ගාසා තීරයේ යුද ගැටුම් මේ වන විට තීව්‍ර ස්භාවයක් ගෙන ඇත්තේ ඊශ්‍රායල හමුදා සිදුකරන ගොඩ බිම් ප්‍රහාර දැඩි කිරීම හේතුවෙන්.
ගාසා තීරයට එල්ලවූ ප්‍රහාර හේතුවෙන් මේවන විට මිය ගිය පිරිස 10,300ක්.
ඉන් 4200ක් කුඩා දරුවන් වන අතර එක්සත් ජාතීන්ගේ සංවිධානය පවසන්නේ ඊශ්‍රායල ප්‍රහාර හමුවේ ගාසා තීරයේ දිනකට ළමුන් 160ක් මිය යන බවයි.
අශ්රෆ් අල්- කුවාද්රා – ගාසා සෞඛ්‍ය අමාත්‍යංශ ප්‍රකාශක ඊශ්‍රායල ප්‍රහාර නිසා මේ වන විට ගාසා තීරයේ ළමුන් 4200ක් පමණ මිය ගිහින් තිබෙනවා.
තුවාල ලැබු ළමුන් ගණන 10,000කට අධිකයි, ඊශ්‍රායල ප්‍රහාර ගාසා තීරයේ සෑම මිනිත්තු 10කට වරක්ම ළමා ජීවිතයක් උදුරාගන්නවා. ප්‍රහාර වලට ගොදුරු වූවන්ගෙන් 70%ක්ම කාන්තාවන් සහ දරුවන්, ඒ අනුව අද මුළු ගාසා තීරයම කාන්තාවන්ගේ සහ දරුවන්ගේ සුසාන භූමියක් වී අවසන්.
ඊශ්‍රායල ආරක්ෂක අමාත්‍යවරයා පවසන්නේ ගොඩබිමින් ,ගුවනින් සහ මුහුදෙන් මෙහෙයුම් සිදු කළ භට පිරිස් මේ වන විට ගාසා තිරයේ හදවත බඳු ගාසා නගරය මුළුමනින්ම වැටලූ බවයි.
මේ අතර ගාසා තීරයේ විනෝද උද්‍යානයක හමාස් සටන්කාමීන් පවත්වාගෙන ගිය උමං පද්ධතියක් සොයා ගැනීමට හැකිවූ බව ඊශ්‍රායලය පවසනවා.
ගාසා තීරයේ රෝහල් ආශ්‍රිත හමාස් ඉලක්ක වෙත ඊශ්‍රායල හමුදා ප්‍රහාර එල්ල කළ ආකාරය දැක්වෙන දර්ශන ඊශ්‍රායලය මුදාහැර තිබෙනවා.
