රුසියාවේ ඔත්තු බැලූ තල්මසා මියයයි
වසර පහක් පුරා නෝර්වේ වෙරළ තීරයක් ආසන්නයේ ගැවසෙන බෙලූගා වර්ගයට අයත් තල්මසෙකු කාගෙත් අවධානය දිනාගත්තේය.
ගෝ ප්‍රෝ (GoPro) වර්ගයේ කැමරාවක් සවිකළ බඳපටියකින් සැරසුණු එම තල්මසා, රුසියානු ඔත්තුකරුවෙක් බවට නෝර්වේ බලධාරීන් සැක කළේ.
එම සත්ත්වයා නිතර නිරීක්ෂණය වූයේ රුසියාවේ උතුරු බලඇණිය ස්ථානගත කර ඇති මර්මන්ස්ක් සහ නෝර්වේ අතර සාගර කලාපයෙන් වීම හේතුවෙන් එම මතය වඩාත් තහවුරු වුණි.
අසාමාන්‍ය ලෙස මිනිසුන් සමඟ කුළුපඟ මේ තල්මසා, නම් කර තිබුණේ හල්දිමීර් ලෙසය.
හල්දිමීර්ගේ නම තැබීමේදී නෝර්වේ බසින් තල්මසා යන ‘හල්’ යන වදනත්, ව්ලැද්මීර් පුටින් ජනාධිපතිවරයාගේ නමින් කැඩී එන ‘දිමීර්’ යන වදනත් භාවිත කර තිබේ.
අවුරුදු 15ක් පමණ වයසැති හල්දිමීර්ගේ මළසිරුර නෝර්වේ හි රීසාවිකා වෙරළාසන්න මුහුදේ පාවෙමින් තිබියදී පසුගියදා හමුවුණේ එම සත්ත්වයා සමීපව නිරීක්ෂණය කර ඇති සියලුදෙනාම කම්පාවට පත්කරමිනි.
සත්ත්වයා මියගියේ කවර හේතුවක් මත ද යන්න මෙතෙක් අනාවරණ වී නොමැති අතර තල්මසාගේ සිරුර නෝර්වේ වෙත ගෙනැවිත් ඒ සම්බන්ධ විමර්ශන ආරම්භ කර තිබේ.
