ට්‍රම්ප්ගේ තීරුබදු ලැයිස්තුව අද ප්‍රකාශයට
අමෙරිකාවට අපනයනය කරන සියලු රටවලට බලපෑම් එල්ලවන විශාලතම තීරුබදු ලැයිස්තුවක් ජනාධිපති ඩොනල්ඩ් ට්‍රම්ප් අද (2) නිවේදනය කිරීමට නියමිත බව විදෙස් මාධ්‍ය වාර්තා කරනවා .
දැනටමත් තීරුබදු වැඩි කර ඇති රටවලටත් නැවත අදාළ වන පරිදි ජනාධිපතිවරයා සැලසුම් කර ඇති නව තීරු බදු ලැයිස්තුවෙන් ගෝලීය ආර්ථිකයට දැඩි බලපෑම් එල්ල වනු ඇතැයි දැනටමත් ලෝක ආර්ථික විශේෂඥවරුන් අනාවැකි පළ කර ඇති බවයි විදෙස් මාධ්‍ය වැඩිදුරටත් වාර්තා කරන්නේ .
අමෙරිකාවේ භාණ්ඩාගාර ලේකම් ස්කොට් බෙසන්ට් ප්‍රකාශ කර ඇත්තේ අද නිකුත් කිරීමට නියමිත ලැයිස්තුවට අනුව අමෙරිකාවේ විශාලතම වෙළෙඳ ගනුදෙනු සිදුකරන රටවලට 15%කින් තීරුබදු අය කිරීමට ඩොනල්ඩ් ට්‍රම්ප් සැලසුම් කර ඇති බවයි වාර්තා වන්නේ .
ඒ අනුව දැනටමත් තීරුබදු ඉහළ නංවා ඇති රටවලට නව තීරුබදුවලින් දුෂ්කරතා රැසකට මුහුණ පෑමට සිදුවන බව විදෙස් මාධ්‍ය සඳහන් කරනවා .
පෙරේදා වාර්තාකරුවන් අමතා ඩොනල්ඩ් ට්‍රම්ප් ප්‍රකාශ කර ඇත්තේ බදාදා (02) නිවේදනය කරන නව තීරුබදු අමෙරිකාවේ ආර්ථිකය ඉහළ නැංවීමට ඉවහල් වනු ඇති බවයි එම වාර්තාවල සඳහන් වන්නේ .
ඔහු අද දිනය අමෙරිකාවේ විමුක්ති දිනය ලෙස හඳුන්වා ඇති අතර, මේ තීරුබදු ඉහළ නැංවීම දිගු කාලයක් පුරා අපේක්ෂා කළ දැවැන්ත මෙහෙයුමක් ලෙස සඳහන් කර තිබෙනවා .
අමෙරිකාවේ නිෂ්පාදන අංශය ආරක්ෂා කරගැනීමට සහ ශක්තිමත් කරගැනීමට නව තීරුබදුවලින් හැකියාව ඇතැයි ද, අමෙරිකාවට භාණ්ඩ අපනයන කරන සියලුම රටවලට තීරුබදු ඉහළ නැංවීමට පියවර ගන්නා බව ද ප්‍රකාශ කර ඇතැයි වාර්තා වෙනවා .
