“චිකුන්ගුන්යා” රෝගය පැතිරයාමේ අවදානමක්
‘චිකුන්ගුන්යා” රෝගය පැතිරයාමේ අවදානමක් පවතින බැවින් රෝග ලක්ෂණ ඇත්නම් වහාම වෛද්‍ය ප්‍රතිකාර වෙත යොමුවන්නැයි සෞඛ්‍ය අංශ ජනතාවට දැනුම් දෙනවා .
වෛද්‍යවරු පවසන්නේ, මේ දිනවල මදුරු ගහණයේ වැඩිවීමක් පවතින හෙයින් මදුරුවන් බෝවන ස්ථාන හැකි පමණින් විනාශ කිරීමෙන් ”චිකුන්ගුන්යා” රෝග ව්‍යාප්තිය පාලනය කරගත හැකි බවයි .
ලොව රටවල් 115ක පමණ ව්‍යාප්ත වී ඇති ”චිකුන්ගුන්යා” රෝගය මේ වනවිට ශ්‍රී ලංකාව තුළද පැතිරයමින් පවතින බව සෞඛ්‍ය අංශ අනතුරු අඟවනවා .
මේ වනවිට මෙරටින් ‘චිකුන්ගුන්යා’ රෝගීන් 190ක් වාර්තා වී ඇති අතර ඉන් 65ක් ‘චිකුන්ගුන්යා’ රෝගීන් බවට සායනිකව තහවුරු වී ඇති බව සඳහන් .
වැඩිම රෝගීන් සංඛ්‍යාවක් වාර්තා වී ඇත්තේ බස්නාහිර පළාතෙන් .
මේ අතර ඩෙංගු යළි හිස ඔසවමින් පවතින පසුබිමක අද වන විට රත්නපුර ශික්ෂණ රෝහලේ කාර්ය මණ්ඩලයේ 37 දෙනෙකු ඇතුළුව රෝගීන් 87 දෙනෙකු ඩෙංගු රෝගයට ගොදුරු වී ප්‍රතිකාර ලබමින් සිටිනවා .
ඒ අනුව රෝහල් පරිශ්‍රය සහ ඒ අවට ප්‍රදේශය කඩිනමින් පවිත්‍ර කිරීමේ කටයුතු මේ දිනවල සිදු කෙරෙන බවයි සඳහන් වන්නේ .
මේ අතර විදෙස් රටක සිට මෙරටට පැමිණි හොරණ ඇල්ලකන්ද ප්‍රදේශයේ පුද්ගලයෙකුට මැලේරියා රෝගිය වැළඳී ඇති බවට හොරණ දිස්ත්‍රික් රෝහලේ දී තහවුරු වී තිබෙනවා
පරීක්ෂණ සිදුකරන කළුතර මැලේරියා රෝග මර්දන ඒකකයේ සෞඛ්‍ය කීට විද්‍යා අංශය පැවසුවේ ඔහු පදිංචි ප්‍රදේශයේ මැලේරියා ප්‍රධාන වාහක මදුරුවන් හමුවී නැතැත් ද්වීතික වාහක මදුරුවන් හමුවී ඇති බවයි .
ඒ අනුව සෞඛ්‍ය කීට විද්‍යා අංශය විසින් ප්‍රදේශය අවට ජනතාව දැනුවත් කිරීම හා ඔවුන්ගේ ආරක්ෂාව සඳහා ප්‍රතිරෝධක මදුරුදැල් ලබාදීම සිදුකර තිබෙනවා .
මැලේරියා රෝගය තුරන් කළ රටක් ලෙස 2016 වසරේදී ශ්‍රී ලංකාව නම් කළද මේ වසරේ මේ දක්වා කාලය තුළ මැලේරියා රෝගීන් 14 දෙනෙකු වාර්තා වී ඇති බවයි ජාතික මැලේරියා මර්දන ව්‍යාපාරය පවසන්නේ .
ඔවුන් සියලුදෙනා විදෙස් රටවල සංචාරය කර මෙරටට පැමිණි ශ්‍රී ලාංකිකයින්
