ණය දෙන්නේ ආදරයට නෙවෙයි – දැන් ණය ගෙවන්නේ කොහොමද?
වර්තමානය වන විට ශ්රී ලංකාව පත්ව ඇති තත්වය අනුව විදෙස් රටවල් රැසක් අවස්ථාවෙන් ප්රයෝජන ගැනීමට මාන බලමින් සිටින්නේ කුසගින්නේ සිටින හිවලුන් රැලක් මෙනි. එවන් වකවානුවක විදෙස් රටවල් සමග ගණුදෙනු කිරීමේදී ඉතාමත් කල්පනාකාරී විය යුතුය. නමුත් මෙරට දේශපාලකයින්ට කුමන ආකාරයෙන් හෝ මුදල් ලැබෙනවා නම් අවශ්ය වන්නේ එපමණකි. දේශයට, මිනිසුන්ට හෙණ ගැසුවත් කමක්නැත.
මෙතුවක් කාලයක් පුරාවට ශ්රී ලංකාව විශාල ණය දැලක පටලවමින් මෙරට පාලකයින් ගෙන ගිය ක්රියා කලාපය හේතුවෙන් අනාගත පරපුරටද ජීවත් වීමට සිදු වන්නේ අති විශාල ණය බරක් හිස දරාගෙනය. වර්තමානය වන විට චීනය, ශ්රී ලංකාව අත්පත් කරගැනීමේ සිහින දකිමින් සිටියි. මන්ද චීනයෙන් ලබා ගත් ණය මුදල්, ශ්රී ලංකාව මේ වන විට පවතින තත්වය අනුව කිසිසේත්ම ගෙවා ගත නොහැකි වන බව චීනය හොඳින්ම දන්නා නිසාය. චීනය බලාපොරොත්තු වුයේද මෙවන් අවස්ථාවකය. ඔවූහු මෙතරම් කාලයක් ණය පිට ණය ලබා දෙමින් ඉව ඇල්ලුවේ ශ්රී ලංකාවේ මෙවන් තත්වයක් උදා වන තුරුය.ණය ගෙවා ගනු නොහැකි තැන ශ්රී ලංකාවේ කොටසින් කොටස චීනයට ඇත වන බව ඔවුන් හොඳින් දැන සිටියහ.
කෛරාටික චීනය මේ මොහොතේ තවත් කුමන්ත්රණයක නියැලෙමින් සිටියි. මේ වන විට චීනය මෙරටට ණය ලබා දීම ප්රතික්ෂේප කරමින් සිටිති. සංචාරක ක්ෂේත්රයට අහිතකර ලෙස බලපා ඇති COVID-19 වසංගතය හේතුවෙන් දැවැන්ත චීන ණය බර නැවත අලුත් කිරීමට ආයාචනා කළ ශ්රී ලංකාවට, සහය දීම චීනය ප්රතික්ෂේප කළ බව මාධ්ය වාර්තාවක් පවසයි.
කොවිඩ් 19 වසංගතය හමුවේ මතුව ඇති ආර්ථික අර්බුදය සමනය කිරීම සඳහා ණය ප්රතිව්යුහගත කිරීමක් සම්පාදනය කළ හැකි දැයි මෙරට පාලන තන්ත්රය ආයාචනා කළේය. ශ්රී ලංකා ජනාධිපති ගෝඨාභය රාජපක්ෂ චීනයේ විදේශ අමාත්ය වැන්ග් යී මහතා සමඟ පැවති සාකච්ඡාවකදී, ශ්රී ලංකාවේ ගැඹුරු වන විදේශ විනිමය අර්බුදය සහ විදේශ ණය ගැතිවීම හමුවේ බීජිං හි සහාය ඉල්ලා සිටියේය.
ණය සහනයක් සඳහා ශ්රී ලංකාවෙන් අපේක්ෂිත ඉල්ලීම පිළිබඳ ප්රශ්නයකට පිළිතුරු දෙමින්, චීනයේ විදේශ අමාත්යාංශ ප්රකාශක ෂාඕ ලිජියන් ප්රවෘත්ති සාකච්ඡාවකදී කියා සිටියේ, “ශ්රී ලංකාවේ සමාජ – ආර්ථික සංවර්ධනය සඳහා චීනය උපරිම සහයෝගය ලබා දුන් බවයි. එසේම හැකි පමණින් එය දිගටම කරගෙන යනු ඇත.” Hong Kong post වාර්තා කළේය.
“චීනයේ BRI ව්යාපෘති, වාර්තාගත උද්ධමනය, ආහාර මිල ඉහල යාම සහ ජනතාව විඳින දුක් ගැහැට නිසා ශ්රී ලංකාවේ ආර්ථිකය මඩ ගොහොරුවකට හසුවීම ගැන චීනය කිඹුල් කඳුළු හෙළා ඇත” යනුවෙන් මාධ්ය වාර්තාවක දැක්වේ.
“කෙසේ වෙතත්, ප්රධාන උත්සුකය නම්, එවැනි සෘණාත්මක තත්වයක් යටතේ චීනයෙන් ණය ගැනීම් සම්බන්ධයෙන් ලංකාවේ ආකල්පයට බලපාන්නේ කෙසේද යන්න සහ චීනය සහ ශ්රී ලංකාව අතර සම්බන්ධතාවය වෙත එය බලපාන්නේ කෙසේද යන්න මෙන්ම ශ්රී ලංකාවේ අත්දැකීම් ගැන කනස්සල්ලක් පවතින බවත්, මියන්මාරය, මැලේසියාව සහ නේපාලය වැනි රටවල් චීන ආයෝජන ව්යාපෘති අත්හිටුවීමට පියවර ගන්නා බවත් එහි වැඩිදුරටත් සඳහන් වේ.
ශ්රී ලංකාවේ ප්රධාන විදේශ විනිමය උපයන්නන්ගෙන් එකක් වන ජාත්යන්තර සංචාරක ගමනාගමනය, වසංගතයෙන් පසුව ශ්රී ලංකාවේ අර්බුදය පැහැදිලිව පෙනෙන්නට තිබුණද, චීනයෙන් නොසැලකිලිමත් ලෙස ණය ගැනීම්වල අවසාන ප්රතිඵලය ලෙස රටේ ණය වේගයෙන් ඉහළ ගොස් විදේශ විනිමය සංචිත හැකිලී ගියේය. යටිතල පහසුකම් ව්යාපෘති සඳහා මුදල් යෙදවීමට හෝ ඩොලර් සංචිත රට තුල නොමැති බවද, Hong Kong Post වාර්තා කළේය.
වසංගතයට ගොදුරු වූ සංචාරක ව්යාපාරයත් සමඟ, ඒ වන විටත් අධික ණය බරින් වෙව්ලමින් සිටි ශ්රී ලංකාවේ ආර්ථික ව්යුහය බිඳ වැටුණි. මෙම ණය වලින් ප්රධාන කොටසක් චීනයට ගෙවිය යුතු වූ අතර එය ඩොලර් බිලියන 8 කට ආසන්නය.
මෙම ණය බර චීනයේ හම්බන්තොට වරාය සහ කොළඹ වරාය නගරය සහ මහා මාර්ග ව්යාපෘතිවලට මුලපිරීමේ ව්යාපෘතිවල ප්රතිඵලයක් වූ අතර ඒ සඳහා චීන නියෝජිතායතන දැඩි ආපසු ගෙවීමේ කොන්දේසි යටතේ ශ්රී ලංකාවට විශාල මුදලක් ණයට දුන්හ.
සැලකිය යුතු ලෙස, 2021 සහ 2022 දී, බීජිං වෙත ගෙවිය යුතු ණය ප්රමාණය ඇමරිකානු ඩොලර් බිලියන 2 කට ආසන්න විය. තවද, හම්බන්තොට වරාය දැනටමත් ඩොලර් බිලියන 1.2 කට සාපේක්ෂව වසර 99 කට චීනයට බදු දී ඇත.
දේශය උගසට තබා හෝ මේ වන විට ණය පිට ණය ගෙන අවසන්ය. අනාගතයේ උපදින කුඩා දරුවා පවා ඒ ණය ගෙවිය යුතුයි. මේ ණය උගුලෙන් ගැලවීමට පවතින හෝ පත්වෙන රජයන් විසින් ගත යුතු ක්රියාමාර්ග මොනවාද? ඔවුන්ට ඒ සඳහා දැක්මක් තිබේද ? ඒ දැක්මක් තිබේනම් එය ප්රකාශ කිරීමට කාලයයි.