වසර අවසන් වීමට පෙර ප්රජාතන්ත්රවාදය සක්රියව ක්රියාත්මකවන සමාජයක් ගොඩනඟනවා
රජය ප්රමුඛතාව ලබා දී ඇත්තේ රටේ වැටී ඇති ආර්ථිකය ප්රකෘතිමත් කිරීම සඳහා බවත්, එමෙන්ම රට අරාජිකත්වයට පත් වීමට ඉඩ නොතබා නීතිය හා සාමය ආරක්ෂා කරන බවත් ජනාධිපති රනිල් වික්රමසිංහ අවධාරණය කළා.
ජනාධිපතිවරයා මේ බව සඳහන් කළේ අද (18) පෙරවරුවේ කොළඹ ටාජ් සමුද්ර හෝටලයේ පැවති රොටරි සමාජයේ ශ්රී ලංකාව සහ මාලදිවයින ඇතුළත්වන දිස්ත්රික් අංක 3220 විසින් සංවිධානය කරන ලද 32 වන රොටරි දිස්ත්රික් සමුළුව අමතමින්.
රටේ ආර්ථිකය කඩිනමින් යථා තත්ත්වයට පත්වනු ඇති බවට මෙහිදී විශ්වාසය පළ කළ ජනාධිපතිවරයා මේ වසර අවසන් වීමට පෙර රට තුළ ප්රජාතන්ත්රවාදය සක්රියව ක්රියාත්මකවන සමාජයක් ගොඩනඟන බවට ද සහතික වුනා.
එමෙන්ම රටේ ආර්ථික ගැටලු විසඳා ගැනීමත් සමග තවදුරටත් ජනතාවට පීඩාවට පත්වීමට ඉඩ නොතබන බව අවධාරණය කළ ජනාධිපතිවරයා රජය සියලු තීන්දු තීරණ ගන්නේ ඒ වෙනුවෙන් බව ද කියා සිටියා.
තමන් ප්රජාතන්ත්රවාදය අගය කරන නායකයෙකු බව පැවසූ ජනාධිපති රනිල් වික්රමසිංහ නමුත් රටකට ප්රජාතන්ත්රවාදය සඳහා පළමුව මහජන සාමය අවශ්ය බවත්, ඒ සඳහා නීතිය හා සාමය පවත්වා ගැනීම අවශ්ය බවත් සඳහන් කළා.
රටක නීතිය හා සාමය නොමැතිව ප්රජාතන්ත්රවාදය පැවතිය නොහැකි අතර ප්රජාතන්ත්රවාදය සඳහා දෙවනුව ස්ථාවර ආර්ථිකයක් අවශ්ය බව ද ජනාධිපතිවරයා පෙන්වා දුන්නා.
නීතිය, සාමය සහ ආර්ථික ප්රකෘතිය නොමැති රටක ඇත්තේ ප්රජාතන්ත්රවාදය නොව අරාජිකත්වය බව වැඩිදුරටත් සඳහන් කළ ජනාධිපති රනිල් වික්රමසිංහ රට අරාජිකත්වයේ මාවතේ පහළට ගෙන යාමට තමා කිසිවිටක ඉඩ නොතබන බවත්, රටේ නීතිය හා සාමය සහතික කිරීමට කැපවන බවත් අවධාරණය කළා.
ආර්ථිකය යළි ප්රකෘත්මත්වීමත් සමග ලබන වසරේ දී තම ඡන්දය භාවිතා කර, රටේ සිදුකළ යුතු වෙනස්කම් සහ තමන්ට අවශ්ය අනාගතය නිර්මාණය කර ගැනීමට අවැසි පසුබිම ජනතාවට සකස් වනු ඇති බවට ද ජනාධිපතිවරයා විශ්වාසය පළ කළා.