පොලී අනුපාතය අඩු කළොත් උද්ධමනය 100% වෙයි – මහ බැංකු අධිපති
මෙරට උද්ධමනය මේ මාසයේ දී තවදුරටත් ඉහළ ගොස් ඉන් පසු ව පහළ යනු ඇතැයි ශ්රී ලංකා මහ බැංකුවේ අධිපති ආචාර්ය පී. නන්දලාල් වීරසිංහ මහතා අද (6) පැවැසීය.
මේ වසරේ 7 වැනි මුදල් ප්රතිපත්ති විවරණය දැනුම් දීමේ අවස්ථාවට එක්වෙමින් මහ බැංකු අධිපතිවරයා ඒ බව කීය.
සැප්තැම්බර් මාසයේ දී උද්ධමනය ශ්රී ලංකා මහ බැංකුව අපේක්ෂා කළා ට වඩා ඉහළ ගිය බව ද අධිපතිවරයා කීවේ ය.
මෙම මාසයේ දී උද්ධමනය ඉහළ ගොස් ඉන් පසුව පහළ යනු ඇතැයි ශ්රී ලංකා මහ බැංකුව පුරෝකථනය කළ බවත් සත්ය තත්ත්වය ද ඒ දෙසට ගමන් කරමින් තිබුණත් සැප්තැම්බර් මාසයේ දී අපේක්ෂා කළාට වඩා උද්ධමනය ඉහළ ගිය බවත් අධිපතිවරයා කීය.
සැප්තැම්බර් මාසයේ දී උද්ධමනය 67.8 ක් වනු ඇතැයි අපේක්ෂා කළ බවත් කෙසේ නමුත් උද්ධමනය ගණනය කළ පසු 69.8ක් වූ බවත් හෙතෙම කීවේ ය.
කොළඹ පාරිභෝගික මිල දර්ශකයට අනුව උද්ධමනය ලබන මාසයේ දී මෙම මාසයට වඩා අඩුවනු ඇතැයි ද එසේ වුවත් ජාතික පාරිභෝගික මිල දර්ශකයට අනුව මේ මාසයේ උද්ධමනය තවදුරටත් වැඩි වනු ඇතැයි ද වීරසිංහ මහතා පැවැසීය.
මෙම ප්රවණතාව ඉදිරියටත් පවතිනු ඇතැයි ද ඒ අනුව දෙසැම්බර් මාසය වනවිට උද්ධමනය අඩු වී ලබන වසරේ දී තවදුරටත් උද්ධමනය අඩු වනු ඇතැයි හෙතෙම කීය.
ශ්රී ලංකාව මහ බැංකුව මුදල් ප්රතිපත්තිය දැඩි කිරීම හේතුවෙන් මෙලෙස උද්ධමනය අඩු වනු ඇතැයි ද ඔහු කීවේ ය.
ඉහළ පොලී අනුපාත නිසා ව්යාපාරික කටයුතු යනාදිය කරගත නොහැකි වී ඇතැයි ඇතැම් පාර්ශව චෝදනා කරන බව කී අධිපතිවරයා එසේ ව්යාපාරික කටයුතු යනාදිය කරගත නොහැකි වී ඇත්තේ පොලී අනුපාත ඉහළ යෑම නිසා නොව උද්ධමනය ඉහළ යෑම නිසා යැයි ද කීවේ ය.
උද්ධමනය තවදුරටත් ඉහළ ගියහොත් ව්යාපාර කඩා වැටෙනු ඇතැයි ද ඔහු කීය.
පොලී අනුපාත ඉහළ අගයක පවත්වාගෙන යන්නේ උද්ධමනය පාලනය කරගනිමින් අඩු කරගැනීමට යැයි ද ඔහු කීවේ ය.
උද්ධමනය පාලනය වී අඩු වීමේ ප්රවණාතවක් අඩු වූ පසු පොලී අනුපාත අඩු කිරීමට ඉඩ සැලසෙනු ඇතැයි ද අධිපතිවරයා කීය.
සියලු කර් මාන්ත, සියලු ව්යාපාර, සියලු සේවාවලට වඩාත් වැදගත්ම දෙය වනුයේ උද්ධමනය පාලනය කරගැනීම යැයි ද හෙතෙම පැවැසීය.
පසුගිය කාලයේ දී එය කරගත නොහැකි වූ බවත් පසුගිය කාලයේ දී ප්රමාණයට වඩා අඩුවෙන් තබාගැනීමත් මුදල් අච්චු ගැසීමත් යනාදියේ ප්රතිඵල අද අත්විඳින්නට සිදු වී ඇති බවත් ඔහු කීවේ ය.
නැවත වරක් පොලී අනුපාත අඩු කළහොත් උද්ධමනය සියට සීයක් වන බවත් පොලිය අඩු කළොත් ව්යාපාර ඉකමනටම කඩා වැටෙනු ඇති බවත් එම තත්ත්වයෙන් දරුණු ප්රතිවිපාකවලට මුහුණ දීමට සිදුවනු ඇති බවත් හෙතෙම කීය.
සියලු දේ පවත්වාගෙන යා හැක්කේ පොලී අනුපාත ඉහළ අගයක පවත්වා ගැනීමෙන් පමණක් බව කී අධිපතිවරයා උද්ධමනය තවදුරටත් ඉහළ ගියහොත් සියල්ල ඉක්මනින් කඩා වැටෙනු ඇතැයි ද අධිපතිවරයා පැවැසීය.